இஸ்ரேலின் ஈரான் மீதான பாரிய தாக்குதல்கள், அமெரிக்க ஜனாதிபதி டொனால்ட் ட்ரம்ப்பின் “என்றென்றும் போர் இல்லை” என்ற வாக்குறுதியை முன்னெப்போதும் இல்லாத வகையில் சோதித்து வருகின்றன. அமெரிக்கா எவ்வளவு ஆதரவை வழங்கும் என்பதை ட்ரம்ப் தீர்மானிக்கும் நிலையில், இது அவரது ஆதரவுத் தளத்துடன் ஒரு மோதலை ஏற்படுத்தக்கூடும். தாக்குதலுக்கு சில மணி நேரங்களுக்கு முன்பு, தாக்குதல் “பாரிய மோதலை” ஏற்படுத்தும் என்று எச்சரித்த ட்ரம்ப், பின்னர் இஸ்ரேலின் தாக்குதல்களை “சிறப்பானது” என்று பாராட்டினார். அத்துடன், அமெரிக்காவின் உதவியால் இஸ்ரேலிடம் “உலகின் மிகச்சிறந்த மற்றும் மிகவும் கொடிய இராணுவ உபகரணங்கள்” இருப்பதாக அவர் பெருமிதம் தெரிவித்தார். ஈரான் ஒப்பந்தத்திற்கு உடன்படவில்லை என்றால் மேலும் தாக்குதல்களைத் திட்டமிட்டுள்ளதாகவும் கூறினார்.
வெளியுறவுச் செயலாளர் மார்கோ ரூபியோ, இந்தத் தாக்குதல்களில் அமெரிக்காவுக்குப் பங்கு இல்லை என்று வலியுறுத்தியதுடன், அருகிலுள்ள அரபு நாடுகளில் நிலைநிறுத்தப்பட்டுள்ள ஆயிரக்கணக்கான அமெரிக்கப் படைகளுக்கு எதிராகப் பதிலடி கொடுக்க வேண்டாம் என்று ஈரானை எச்சரித்தார். இருப்பினும், அமெரிக்கா, ஈரான் வெள்ளிக்கிழமை ஏவிய பதில் ஏவுகணைகளை இஸ்ரேல் சுட்டு வீழ்த்த உதவியதாக ஒரு அமெரிக்க அதிகாரி உறுதிப்படுத்தினார். வாஷிங்டனில் உள்ள மத்திய கிழக்கு நிறுவனத்தின் ஈரான் திட்டத்தின் ஸ்தாபக இயக்குநர் அலெக்ஸ் வட்டங்கா கூறுகையில், “அமெரிக்கா இஸ்ரேலுக்கு உதவ முடியும் என்று கணக்கிட்டுள்ளது, ஈரானியர்கள் இதை அறிந்திருப்பார்கள். ஆனால் இறுதியில், குறைந்தபட்சம் பொதுமக்களிடையே, அமெரிக்கா வெளியேறுகிறது.” என்றார். ஈரானிய தலைவர்கள் இப்போதைக்கு உயிருடன் இருப்பதில் கவனம் செலுத்துகிறார்கள், ஆனால் ஒரு கடினமான ஒப்பந்தத்தை விழுங்க அல்லது எண்ணெய் வளம் மிக்க வளைகுடாவில் குழப்பத்தை ஏற்படுத்தி, எண்ணெய் விலைகளை உயர்த்தி, ட்ரம்புக்கு அழுத்தம் கொடுத்து மோதலை மேலும் சர்வதேசமயமாக்க முடிவு செய்யலாம் என்றும் வட்டங்கா கூறினார்.
ட்ரம்ப்பின் குடியரசுக் கட்சியின் பெரும்பாலான முக்கிய சட்டமியற்றுபவர்கள் உடனடியாக இஸ்ரேலுக்கு ஆதரவாக அணிதிரண்டனர், ஆனால் ட்ரம்ப்பின் “அமெரிக்கா முதலில்” என்ற பாப்புலிசத் தளம் சந்தேகத்தை வெளிப்படுத்தியுள்ளது. முன்னாள் ஜனாதிபதி பராக் ஒபாமா காலத்தில் இஸ்ரேலுக்கான அமெரிக்கத் தூதுவராகப் பணியாற்றிய டேனியல் ஷாபிரோ கூறுகையில், “டெஹ்ரானின் நிலத்தடி அணுசக்தி வசதிகளை அழித்து, ஈரானிய அணு ஆயுதத்தைத் தடுப்பதற்கு அமெரிக்காவின் தனித்துவமான திறன்களைப் பயன்படுத்த வேண்டுமா என்பது குறித்து ட்ரம்ப் ஒரு கடினமான முடிவை எதிர்கொள்வார்.” என்றார். “இந்த முடிவு அவரது ஆலோசகர்களையும் அரசியல் தளத்தையும் பிரிக்கும்” என்றும் அவர் கூறினார். போட்டியாளரான ஜனநாயகக் கட்சி சட்டமியற்றுபவர்கள் நெதன்யாகுவை கடுமையாக விமர்சித்துள்ளனர். “அமெரிக்கர்கள் விரும்பாத ஒரு போரில் நெதன்யாகு நாட்டை இழுக்க ட்ரம்ப் அனுமதித்தால் ‘அமெரிக்கா முதலில்’ என்பதற்கு என்ன அர்த்தம்?” என்று ஜனநாயகக் கட்சியின் பிரதிநிதி ஜோவாகின் காஸ்ட்ரோ சமூக ஊடகங்களில் கேள்வி எழுப்பினார்.
